ਅਮਰੀਕਾ ਵਿੱਚ ਭਾਰਤੀ ਮੂਲ ਦਾ ਕਾਰੋਬਾਰੀ ਦੋਸ਼ੀ ਕਰਾਰ

ਨਿਊਯਾਰਕ – ਇਨਸਿਸ ਥੈਰੇਪਿਟਿਕਸ ਦੇ ਫਾਊਂਡਰ ਭਾਰਤੀ ਮੂਲ ਦੇ ਜਾਨ ਕਪੂਰ ਨੂੰ ਓਪਿਆਈਡ ਸੰਕਟ ਮਾਮਲੇ ਵਿੱਚ ਅਮਰੀਕਾ ਦੀ ਅਦਾਲਤ ਨੇ ਦੋਸ਼ੀ ਠਹਿਰਾਇਆ ਹੈ| ਕਪੂਰ ਇਸ ਮਾਮਲੇ ਵਿੱਚ ਦੋਸ਼ੀ ਪਾਇਆ ਜਾਣ ਵਾਲਾ ਕਿਸੇ ਫਾਰਮਾਸਿਸਟ ਕੰਪਨੀ ਦਾ ਪਹਿਲਾ ਅਧਿਕਾਰੀ ਹੈ| ਬੋਸਟਨ ਦੀ ਅਦਾਲਤ ਨੇ ਕਪੂਰ ਅਤੇ 4 ਸਾਥੀਆਂ ਨੂੰ ਦੋਸ਼ੀ ਕਰਾਰ ਦਿੱਤਾ ਹੈ| ਉਨ੍ਹਾਂ ਤੇ ਦੋਸ਼ ਸੀ ਕਿ ਉਹ ਆਦਤ ਬਣ ਜਾਣ ਵਾਲੀਆਂ ਦਵਾਈਆਂ ਦੀ ਵਿਕਰੀ ਵਧਾਉਣ ਲਈ ਡਾਕਟਰਾਂ ਨੂੰ ਰਿਸ਼ਵਤ ਦਿੰਦੇ ਸਨ| ਉਹ ਡਾਕਟਰਾਂ ਤੇ ਦਬਾਅ ਬਣਾਉਂਦੇ ਸੀ ਕਿ ਉਹ ਮਰੀਜ਼ਾਂ ਨੂੰ ਅਜਿਹੀਆਂ ਦਵਾਈਆਂ ਲਿਖਣ ਜਿਨ੍ਹਾਂ ਦੀ ਭਾਵੇਂ ਉਨ੍ਹਾਂ ਨੂੰ ਜ਼ਰੂਰਤ ਵੀ ਨਾ ਹੋਵੇ| ਅਰਬਪਤੀ ਵਪਾਰੀ ਤੇ ਬੀਮਾ ਕੰਪਨੀਆਂ ਨੂੰ ਧੋਖਾ ਦੇਣ ਦੇ ਵੀ ਦੋਸ਼ ਹਨ| ਅਮਰੀਕਾ ਵਿੱਚ 1990 ਤੋਂ ਹੁਣ ਤਕ ਦਰਦ ਰੋਕੂ ਦਵਾਈਆਂ ਦੀ ਓਵਰਡੋਜ਼ ਕਾਰਨ ਹਜ਼ਾਰਾਂ ਵਿਅਕਤੀਆਂ ਦੀ ਮੌਤ ਹੋਈ ਹੈ| ਅਮਰੀਕਾ ਵਿੱਚ 2017 ਵਿੱਚ ਓਪਿਆਈਡ ਦਵਾਈਆਂ ਦੇ ਓਵਰਡੋਜ਼ ਕਾਰਨ 48 ਹਜ਼ਾਰ ਮੌਤਾਂ ਦੇ ਮਾਮਲੇ ਸਾਹਮਣੇ ਆਏ, ਜੋ ਹੈਰਾਨੀਜਨਕ ਹਨ| ਓਪਿਆਈਡ ਦਵਾਈਆਂ ਦੀ ਇਕ ਕਿਸਮ ਹੈ, ਇਨ੍ਹਾਂ ਵਿੱਚ ਹੈਰੋਈਨ ਤੋਂ ਲੈ ਕੇ ਕਈ ਦਰਦ ਨਿਵਾਰਕ ਦਵਾਈਆਂ ਹੁੰਦੀਆਂ ਹਨ| ਡਾਕਟਰ ਵੀ ਅਜਿਹੀਆਂ ਦਵਾਈਆਂ ਕਦੇ-ਕਦੇ ਹੀ ਖਾਣ ਦੀ ਸਲਾਹ ਦਿੰਦੇ ਹਨ ਕਿਉਂਕਿ ਲਗਾਤਾਰ ਖਾਣ ਨਾਲ ਇਨ੍ਹਾਂ ਦੀ ਆਦਤ ਪੈ ਜਾਂਦੀ ਹੈ|